هل الفن حرام؟.. أحمد العوضي يجيب

متابعة بتجــرد: كشف الفنان أحمد العوضي رأيه في المقولة التي تتردّد بين الحين والآخر عن حرمانية الفن، مؤكداً أن الفن سلاح ذو حدين، ويمكن الممثل تشكيله كيفما يريد؛ فإما أن يكون حلالاً أو حراماً.

وقال العوضي: “بالنسبة للناس اللي بتقول الفن حرام، كل واحد حر يقول اللي يقوله، بس أنا عن نفسي شايف إن الفن مش حرام بالمطلق، أصل الممثل ده مش بيبيع منكر”.

وأضاف: “شايف إن الممثل بإيده يخلي الفن حرام أو مش حرام، وده عموماً في كل الشغلانات، الصحافي والدكتور ممكن يخلّي شغلانته حرام أو مش حرام، لكن فيه شغلانات هي فعلاً حرام مهما حاولت تجمّلها. الفن يكون حرام لما تقدّم حاجة مش صح والشباب تقلّدك فيها، تخلّيهم يروحوا في اتجاه غلط، الفن بيكون نوع من الترفيه، مع إضافة موعظة فيه، لكن مش إن يكون العمل كله مواعظ، لأني لو عايز أوعّي الجمهور بشكل كامل أروح أعمل برنامج أحسن”.

كما تحدّث العوضي عن خطّته لموسم رمضان 2024، مؤكداً أنه سينفصل فنياً عن زوجته الفنانة ياسمين عبد العزيز، وأن العمل الذي سيشارك فيه سيحمل الطابع الشعبي، مبيناً أن انفصاله عن زوجته لا يعني انفصاله عنها فنياً الى الأبد، ولكنهما ينتظران أن يجمعهما عمل جيد كأعمالهما السابقة.

وعن رأيه في مصطلح السينما النظيفة، أكد العوضي أنه يؤمن به لأن من المهم تقديم أعمال سينمائية لا تخدش حياء الجمهور. إذ قال: “أنا مؤمن إن في حاجة اسمها سينما نظيفة، لأن إيه المشكلة إني أعمل فيلم من غير ما أخدش حياء المشاهد، بس في ناس بتطلع تقول إن السينما سينما ومفيش حاجة اسمها سينما نظيفة، وإن لو مش عاجبك السينما بكل حالتها يبقى سيب الشغلانة، لأ مش هسيبها، وهفضل مقتنع بالمصطلح ده”.

وأضاف: “لو مفيش سينما نظيفة يبقى مش هيكون في فرق بين السينما بتاعتنا وبين سينما المنصات العالمية، اللي بتشجع على موضوعات أنا محبش ابني أو أخويا الصغير يتفرج عليها. السينما النظيفة بتشمل موضوعات كتيرة ومتنوعة، زي الأكشن والدراما والكوميديا، وإني أطلع أعمل أكشن وأضرب حد زي في مسلسلاتي مثلاً، ده مفيهوش حاجة غلط لأني لم أسئ للذوق العام”.

واختتم أحمد العوضي حديثه قائلاً: “المشاهد بيشوف بالفعل، في الشارع ناس بتضرب بعض، وأفلام الأكشن موجودة من أيام ما اتوجدت السينما، ولما أقول أحلى على الأحلى فده لا يسيء للذوق العام في حاجة”.